كنت عامل هالقصيدي تا قولا بحفل
توقيع كتاب من دون إسم
بس قلت بلاها لأنو حاسسا متل
كم واحد سياسي بلا أخلاق
من 13 سنة قرّرت إتركو
لو بتعرفو مين؟
هيدا لبتسمّوه الله
شلت صورتو من الأوضا
لْْتحتها عشر شموع
مبسوط صورتو معروضا
كنت كل يوم بلَلا بدموع
كنت صلًي المسبحة واشكي
وإبكي …
بْرَجِعا مطرحا
وإشكي …
ولتركتو وما سألتو
عملنا ممسحا
متل كأنو نسي
حَطْ قلبو بالتلج وقسي
بالوجع ناسي حياتنا
مجرّحا
سمعت عن لبنان
ردّيي …
عن كم فانوس
ناسيين ربّنا والقدوس
نايمين بالبرلمان
ناسيين أرض لبنان
بلا حريي …
أكتر منن بعد عنا
فوانيس مزروعا
بوزارات مخلوعا
سارقينا منا
موظفين زغار
بإدين مقطوعة
والكبار هنَي هنَي
لبناننا ناسيينو
الرديَي هيي هيي
شعبنا خاربينو
صرخاتو مش مسموعا
كرمالن تركتو لألله
ما تسألو ليش؟
عملو مع الجرّبوه وفاق
قريت الورق اللي انمضا
شفت كيف علينا انقضا
وهالورق صار اتفاق
قلت تا عيش
والراس مرفوع
لازم عيشا للقصّة
لفيها أكبر غصّا
وِانسى كل الوصايا
وإعطي توابيت هدايا
ولضربني عاليمين بخبّطو
ولطلب لقمة خبز بشرحطو
ولطلب نقطة مي بْلَِبِطو
والقال آخ من بلادو بيكحتو
والبدّو يعلّم ولادو بدبحو
والبدّو راسو ينرفع بيمسحو
واللبناني بعملو أجير
وبكفّنو بتابوت
بسلّمو أسير
لازم يموت
وتا صير نايب
ببيع الشرف
وبعيش بقرف
الضمير غايب
بطلب عبايي
من كم حاجب
من الصحرا
بلاد الشوب
بيصنعولي أحلى توب
بدي واحد من عنجر
مخزّق بأقرف خنجر
تاري عنا يا إخوان
هالمسؤولين بلبنان
واحد توبو أمركاني
واحد توبو صحراوي
واحد توبو فلسطيني
واحد توبو قذافي
واحد توبو كنعاني
واحد توبو غزالي
واحد توبو بيلالي
نمت وصرت عم إحلم
بركي بحلمي وبِِِخيالي
بلمح توب متل التلج
وبلاقيلي واحد خرج
يلبس توبو اللبناني