ولِك ريتِك تقبريني
بتتذكر وقفتك عالباب
تعِن وتئِن وتزِن
وأنا نق
وما خَلَِص عتاب
ايه بتذكر
بتتذكر وقت تبرم
كل الليل
تفتش عالكرز والعنّاب
وترجع مقطوع الحيل
وتسأل وتسأل وعندك جواب
ايه بتذكر
وينك بهالأوقات
نسمع غناني
ندردش متل زمان
تقلّي شعر
واتخبى بين هالأبيات
بين القوافي والنغم
بين السحر والنَعم
بين دياتَك والنِعم
وين كلماتَك؟
وين آهاتَك؟
وين سهراتَك
لطلوع الضو
هيك بتغيب
ولو…
بتذكر وقت قلتلي
طول العمر بضَل قول
ولِك ريتِك تقبريني
ايه بتذكر
وشو بتتذكر؟؟؟
بتذكرك نسمة هوا
وأنا مخنوق
بتذكرك صلا
وأنا معجوق
بتذكرك تَلجي
وأنا محروق
بتذكرك شقفة ضو
بتلالي
بتذكرك جنيي
بترقصي قبالي
بتذكرك قصة
بتذكرك غصة
بتذكرك عا كل مفرق
وبتسألي إذا متذكر
لأ مش متذكر
ليش نحن الماضي!!
نحن الحاضر وهلّق
نحن الولاد
ومعجوقين بالفرحة
من زمن
من يوم انشالت الطرحة
بعدو كل يوم أول يوم
بتتذكري؟؟؟
متل ما أنا بتذكّر
ايه بتذكر