يا إخوان الحالي تعباني، المجتمع تعبان العيلي تعباني والظاهر الفكر بلبنان صار بدو سواد، – بيقولولو عنّا بالضيعا كيماوي – بركي بيرجع يشبشب. كل هالأمور بتوجعكن وبتوجعني وإزا في كم واحد موجوع يعني ربنا موجوع علينا، كرمال هيك لازم تعملو شي، وإزا طلع بايدي شي كمان بعملو، كرمال ما يضَلو موجوع هلمعتر لصَلبو من الفان سني. شو يعني لازم يتوجع، يتعذب، ينصلب بعد مرّا، لازم يموت ويقوم بعد مرّا تانحس عادمنا. اذا ضَلينا هيك ايه لازم يموت بركي منرتاح… بس صراحة حرام علينا نموّتو بعد مرّة. منشان هيك خرطشت هوني كلمي انشاالله توصل .
انقالت هيدي القصيدي بحقل توقيع كتاب من دون إسم
بدّي موت بعد مَرّة
ايه لازم موت
الكون الكوّنتو عليل
الأرض كّلا سكوت
وحكم الجهل طويل
الفكر مالو قوت
ايه لازم موت
بدي موت بعد مرّة
من نقطة نور
خلقت اللّون
خلقت الكون
وقادر إخلق مية كون
أنا متت… أنا قمت…
أنا قلت…
يا إنسان ليشك هيك؟
بين إيديك
بنتفة صلا.. بنتفة همس
بتعمل متلي بتخلق شمس
بلا حس، بلا لمس
لكن إنتا كنت زغير
مالك جانح حتى تطير
نزلت نزول وعدت الكََرّة
حتى تموت تاني مرّة
تزكرو يا مؤمنين
مين الصلبني مين
رجال السود
رجال الدين
رجال البيقولو سياسي
بكرا بيوم الدين
بعد الإيام المُرّة
رح أولد تاني مَرّة
ومنن رح إرجع قاسي
حتى موت بعد مَرّة
أنا الطريق
أنا الحق
أنا الصواب
أنا الماشي
أنا المفتاح
أنا الباب
كلكن بتعرفوني
ليش بتنكروني؟
وليش بتحبو العذاب؟
أنا هوي
أنا الكلمي
أنا العجيبي
الكانت بجَرّة
ما تموتوني بعد مَرّة
أنا ما حكمت عا مريم
عا مريم المجدليي
وأنا كل المجد ليي
وهلق لو ما عندكن مريم
بتخلقو مية مريم
بتحكموها
بتدمّروها بِتْمّوتوها
وبتسجنوها
خلف قضبان مُرّة
لازم موت بعد مِِِِِِِِِرّة
أنا متت لأني بحبكن
أنا بحب الموتوني
قلبي رح يساعكن
زغيركن وكبيركن
بكرا بعد ما تفوتو
لا تتقاتلو
لا تسبوني
رح توجعوني
رح نزﹶل دموع
رح أوجع وجوع
أنا اللي قال
أنا اللي إسمي يسوع
بعتت هالمرسال
تا يكون زكرى
بركي ما بموت
بعد مَرّة