في يوم قررت إنو لازم طير متل شي عصفور بالفضا الكبير…
وفي يوم طلعت عا سطح البيت وفزيت، بيتنا كان بالطابق التالت، وبدل ما طير وقعت وجيت عالارض وتكسرت كل عضامي…
بس صحيت رجعت طلعت عالسطح ونطيت وكانت مفاجأة انو طرت يمكن تصدقو يمكن لأ…
هيك خبرني واحد تلاقت فيه من فترة ووقت خلصت خبريتو قلتلو معقولي.!!!!!
قلي ازا مفكر البيت حجار وببناية وإنو انا اول مرة تكسرت عضامي وتاني مرة طرت من الطابق التالت بتكون مجنون..
قلتلو بس شكلك صادق، قلي صح…
بس البيت مش حجار وبيتي مش ببناية والتالت هو مستوى والطيران مش ضروري تحليق…
كل انسان ساكن بالتالت…
وكل انسان في يطير من بيتو اللي بالتالت…
قلتلو دخيلك خلص انتا مجنون …
صلبت ايدي عا وجي وقلت باسم الاب والابن والروح القدس اله واحد آمين ومشيت…
عيطلي وقلي لازم تعرف تعد الطوابق تا تعرف بيتك وين…
كل يوم بتعدن وما بتعرف بيتك… قلتلو اوكي ومشيت…
رجع عيطلي وقلي آب وابن وروح قدس…. نط عنن بايمان اكيد رح تطير ، عند بيي وبيك بيوت كتيرة…
ومن يومتا بيتي اللي بالتالت كل يوم بطلع عا سطحو مرة بطير ومرة بوقع بس الحلو انو كل ما اوقع برجع متل شي طفل بقوم دغري من الوقعة…
قولكن كرمال هيك قلنا يسوع ازا ما رجعنا متل الولاد ما نفوت عا ملكوت الله….
مش مهمة الوقعة الاهم القومة من الوقعة….