منسأل دايما عن الكرم اللي انعم ربنا فيه علينا، من هيدي النعم الفكر، مش قليلة فكر الانسان شو عظيم، بيجي حدا بقلك، صحيح فكر الانسان عظيم وعظيم كتير، اختراعات اكتشافات الخ… مش قليلة انتاج هيدا الفكر، بناء عظيم قلعة بعلبك، اهرامات مصر وكتير قبلن وبعدن، حتى انو فكر الانسان غاص بالمحيطات وسافر بالفضاء اللامتناهي، ما حدا بينكر هيدي الامور الا البلا فكر.
قدام هيدي العظمة، أنا بدي احكي شو ممكن يقدملنا فكرنا على مستوى بسيط وسهل وهين..
شو ممكن أعمل أنا الانسان البسيط بفكري البسيط؟؟؟
بقدر وانا موجوع ومتألم ، استحضر ربنا ينام حدي على تختي ويطبطب عليي ويقلي أنا مش تاركك يا ابني، واشفى…
بقدر بكل لحظة شوق وحنين ارجع عيش متل طفل زغير عم يتشيطن ويلعب هو وبيو وامو، وبضحك..
بقدر زور كل واحد أنا غلطت بحقو واعتذر منو حتى لو هو مش قابل الاعتذار واحضنو وقلو أنا ما بكرهك، وحبو،
بقدر، أنا وعم اشتغل، وعم بتعب، اتذكر الموجوعين وزورن وطبطب علين، ما أنا كنت موجوع واللي بحبني طبطب عليي، ويشفى..
بقدر وانا بعيد مافي حدي كنيسة ، اني زور بيت الله، واسمع كلمة الله ، ما كلامو جواني، حتى اني اتناول جسدو، وعاكتر ما ربنا بحبنا، بيخلق من كل خلية كنيسة الو كرمال يكون فيها، ما نحن الهيكل والكنيسة، وبتبارك…
بقدر أنا وبعيد وقد ما كون بعيد، اني غمض عيوني وشوف أحلى قمرين قدامي وبدل ما غمض عيوني على دمعة بغمضن على بسمة، وبفرح..
نعمة الفكر كنز، الله عطانا ياه، لكن هيدا الكنز الكبير بيكون بلا قيمة إذا حارس هيدا الفكر ما بكون القلب، بتتخايلو فكر قوي جدا من دون عاطفة وحب للبشرية قديش ممكن يضر الناس، واذا فكر مغلف بالعطاء والمحبة شو ممكن يقدم…
ممكن يقدم قصيدة
ممكن يقدم سينفونية
ممكن يقدم قصة
ممكن يقدم لوحة
ممكن يقدم مسرحية
ممكن يقدم رقصة
ممكن يقدم غنية
وممكن يقدم حياة…
أحلى حياة ، هي الحياة اللي بيعيشها الفكر مع حبيبو القلب…
اترك فكرك يحب قلبك وقلبك يحب فكرك…كرمال تحب وتنحب…