مش دايما الظروف بتسمحلك تتسمع على حديث بين كاميرتين، كاميرا بتصور فيديو وكاميرا بتصور صور- عا فكرة هيدا قبل الكاميرا الذكية- قالت كاميرا الصورة لكاميرا الفيديو انتي ما بتقدري تكوني متلي أنا افضل منك متخايلة اني بقدر اربط الانسان بجزء من الثانية وبخليه يعيش ساعات فرح او ساعات حزن…
بعدين حبيبتي مين ما بحب يتصور من كم يوم كنت عم صور طفل عم يولد بعد ما تنفس، وبعد شوي صورت بنت عم تتعمد وتوأم بأول قربانة وصورت الطهور وعرس لحظات الكل بيرجعوها مش قليلة أنا،
فقامت كاميرا الفيديو قالتها أنا متلك بس ما بصور جزء من الوقت فقط فيي صور اكتر، بس أنا حقيقية اكتر منك، انتي انتي بتصوري لحظة وانا بصور قبلها بصور البنت هي ودموعها نازلة ومقهورة ها شب بلا ذوق وفجأة بتسمع صوت ضحكي يا بنت عم صور وانتي يا كاميرا الصورة بتلقطي الضحكة اللي ورا الدمعة وانا مكملة عم صور دمعتها…
انتي بتفرحي بالضحكة التمثيل وانا ببكي مع الدمعة الحقيقية…
غريب امرن هالناس الضحك والبكي عندن قدام الكاميرات
وخلف الكاميرات غافية حقيقتهم اللي ما حدا صورها…
صورة الناس قد ما كانت حقيقية بتضل مزورة لأنو الكاميرات صورت العالم الخارجي وما قدرت تصور الحقيقة الداخلية…
قولكن لو الكاميرا بتصور حقيقتنا، كم واحد منا بيوقف قدام الكاميرا تا يتصور؟؟؟؟