بيني وبينك انا بآمن عا زوقي
عم يسألوني بتسترجي؟؟؟
قلت بسترجي شو
قالو: بسترجي تقول اللي بتفكر فيه؟
قلتن حسب، في شي بسترجي قولو وفي شي ما بسترجي قولو لأني بخاف.
وبالفعل ما بسترجي، ما أنا جبان وبخاف
ما بسترجي احكي عن الجنس، لأنو عندك اكتر من مليار نسمة مش فاهمة الجنس، وبس احكي عنو يمكن يزعلو، بتتخايل ازا المليار حطّوني قدّامن وكل واحد نفخ نفخة شو بيصير فيي؟
بخاف قول إنو الجنس هوي فعل مقدس وكتار عم حيوينو الجنس، ما بسترجي أوصف أبجدية الجنس ازا عندك ناس بتخلص الجنس ومش بايسة بوسة، بخاف وما بسترجي قول انو الجنس هو عبادة، الجنس إنك تخلي شريكك بكل لحظة يحس إنو أعظم انسان بالدني، ما بسترجي قول إنو الانسان هوي وعم يعمل جنس في مخلوقات كونية سامية كتير ناطرة اللحظة اللي بيخلّصو الجنس فيها تا يفرزو روح لهالنطفة. ما بسترجي قول انو من خلال الجنس بتكون عم بتشارك الله بفعل الخلق والتطور الانساني والكوني.
كيف بدك ياني احكي عن الجنس ازا عندك اكتر من مليار مولود فاهم الجنس اعضاء تناسلية وافرازات، انا هيك موضوع بخاف احكي عنو وما بسترجي فوت فيه. مشانق مفهوم الدكر بتتعلقلي، الجنس مش دكر وإنتاية، الجنس هوي فعل ترابط بين كائنات سماوية وارضية، انا جبان لدرجة إني ما بقدر قول إنو بواب السما بتتجهّز تا تفتح بوابة من خلال بوسة.
ما بسترجي احكي عن هالموضوع لأنو الجنس بيخلّي الرجال والمرا يصيرو واحد، ايه بيصيرو واحد. عندك شي مليار دكر مش قابلين يتوحدو بالله بدك ياهون يتوحدو بمرا. الجنس هو اهم علاقة روحية بتصير بين الناس، ما بسترجي قول انو عندك انواع من الجنس وممكن الجنس ما يكون جسدي يكون غير شي.
قالولي ماشي، شو اللي ما بتسترجي تحكي عنو؟
قلتلن انا ما بسترجي احكي عن الدين، لأنو مع اكتر من مليار انا كافر مع انو بيني وبينك انا بآمن عا زوقي
ما بسترجي احكي مين الله؟؟؟
وما بسترجي اسأل؟؟؟
وما بسترجي اعطي رأيي وقول:
إنو الله غير معروف شو هوي؟ وشو شغلتو؟ وشو ناطر؟ وأيش بدو من لبكة الخلق كلها؟ لشو وجعة هالراس؟؟؟
ما بسترجي قول انو الله ما إلو علاقة فينا وما خصّو وما بيتدخل بشي بخصنا، حتى ولو صلينا ليل نهار مش رح يرد، اصلا ما بسترجي قول انو منصلي لكائن ما منعرفو وما خصنا فيه وما خصو فينا.
ما بسترجي قول انو اللي نحنا منسمي ابن منو هوي الابن اللي نحنا مفكرينو، نحنا تايهين بين ابن وابن ومش عارفين كوعنا من بوعنا. ما بسترجي قول انو يسوع منو ابن الله بالمفهوم اللي منعرفو يسوع هو ابن الابن الابدي اللي هو ابن الاب المطلق وهوي اللي خصو فينا ونحنا منلتجي الو، ما بسترجي احكي عن الدين لأنو الناس اللي بتفكر حالا بتفكر، بتصير تناقش وجود الله ونحن لا خصنا فيه ولا خصو فينا وعا اساس هني علمانيين، ما بسترجي قول انو يسوع ما ولد بمغارة متل ما مفكرين المغارة رمز لغير شي، وتعا قول للعالم انو يسوع منو عمانوئيل اللي فاهمينو، كيف بدي استرجي قول هيك كلام؟ كيف بدي قول انو وقت يسوع كان عالارض مين كان مستلم ادارة هالكون؟ ما بسترجي قول انو ادم وحوا خبرية ولادية معانيها مخباية، كيف بدي استرجي قول انو يسوع اساسو مش يهودي وكيف بدي استرجي قول انو موسى دباجة ما قال عنو بولس وج مزيف، كيف بدي استرجي قول انو يسوع ما عمل دين، الناس هني اللي عملو الأديان، كيف بدي استرجي قول انو يسوع منو كبير كتير متل ما مفكرين يسوع نقطة ما الها مسافات ومساحات بس نقطة واعية كل شي كان وكل شي عم بيكون وكل شي رح يكون. انا جبان لدرجة إني ما بسترجي قول انو الكنيسة مش كومة حجار، كيف بدي استرجي قول انو نحنا ما منخاف نموت لأنو راجعين. هلق كيف ووين هيدي غير خبرية بس راجعين. كيف بدي استرجي قول انو الله مش الله تبعنا ومش بينا متل ما مفكرين، بينا مش الله يا عالم، ما بسترجي قول انو بيي الروحي هو اللي عاطينو صفة مسيح وهو مش مسيح هو ايل، ما عا اساس إسمو عمانوئيل كيف ايل صارت الله؟؟؟
انا ما بسترجي قول انو نحنا مش امتداد لليهود وما خصنا فيون، نحن قبلن وقبل كتار غيرن، ما بسترجي قول شو قال معلمي عنن. قالولي وشو كمان اللي ما بسترجي تحكي عنو؟؟؟
قلتلن السياسة…
سألوني ليه ما بتسترجي؟؟
قلت والله لازم تكونو فهمتو وانتو تقولولي ليه؟