
مش لأنّو أعماركن زغيري ، ولا لأنّو حجمكن زغير.
إنتو زغار بالوطنيي، وزغار بالوعي السياسي، وزغار بالرؤية البعيدة، والأخطر إنكن بزغركن، زغّرتو لبنان.
زغّرتو لبنان، من وطن كان لازم يفكّر بسنين وعقود لقدّام، لبلد عم يفكّر من استحقاق لاستحقاق، ومن أزمة لأزمة، ومن جورة لجورة. زغّرتو القضية اللبنانية وحوّلتوها لحسابات زغيرة، والوطن أكبر منكن ومن أحزابكن ومن زعاماتكن ومن كل المشاريع اللي بتتعامل مع لبنان كأنّو مزرعة أو ساحة أو ورقة تفاوض.
الزغار قالوا إنّ لبنان لازم يكون آخر بلد يوقّع السلام. وهون بتظهر كل العقدة، شو هالفهم الزغير للوطن الكبير ولتاريخو الأكبر؟
ليش لبنان، اللي كان منارة الشرق، وملتقى الحضارات، وصاحب أقدم المرافئ والعلاقات والانفتاح، لازم يضلّ آخر واحد؟
ليش لازم يكون دايمًا آخر اللي بيفهم، وآخر اللي بيقرر، وآخر اللي بيطلع من الحروب؟ لبنان ما لازم يكون آخر مَن يوقّع السلام، لبنان لازم يكون المبادر.
لا، مش لأنّو ضعيف وبدو يهرب من الخطر، بل لأنّو القوي هو اللي بيعرف إنّو السلام قرار استراتيجي، مش استسلام.
القوي هو اللي بيقرا التاريخ قبل ما يفوت بالتاريخ كضحية.
والقوي هو اللي بيقود بدل ما يضلّ ناطر غيرو يقررلو إمتى يتحرّك.
لبنان لازم يكون بمقدمة عملية السلام، مش بآخر الصف.
لازم يكون هو اللي بيطرح الرؤية، ويفتح الأبواب، ويحوّل الجغرافيا من لعنة إلى فرصة، ويستعيد دوره الطبيعي كجسر بين الشعوب والاقتصادات والثقافات.
شو يعني لبنان يكون آخر مَن يوقّع؟
يعني نضلّ ناطرين غيرنا يخلص مصالحو، ويرتّب حساباتو، ويقسم النفوذ، وبعدين يتركونا نلمّ الفتات؟
لا يا جماعة.
هيدا مش حذر سياسي، هيدا عجز متنكّر بثوب الحكمة، لبنان مش مفروض يمشي ورا العالم العربي او غير العربي .
لبنان، إذا عرف قيمتو وتاريخو ومصلحتو، فيه يكون راس الحربة بعملية السلام بالمنطقة، لأنّو السلام الحقيقي مش ورقة توقيع، بل مشروع مستقبل.
إنتو زغار، لأنكن بعدكن شايفين السياسة بردّة الفعل.
إنتو زغار، لأنكن معتبرين إنّ المبادرة تهوّر، وإنّ الانتظار حكمة.
إنتو زغار، لأنكن خايفين من بكرا، فعم تخلّوا الماضي يحكم المستقبل.
لبنان كبير، بس المشكلة إنّو انحكم بعقول زغيرة.
وإذا بدنا نرجّع نكبّر لبنان، لازم أول شي نكبّر نظرتنا إلو. مش آخر مَن يوقّع، بل أوّل مَن يبادر.
لأنّ السلام مش للزغار.
السلام للّي عندن رؤية كبيرة لوطن كبير.